Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Ministry of Education.

Ngā Whakapuakitanga o Ngā Kare-a-roto o te Kapa Haka

Ngā tuhituhinga

Ko te wairua o te taiao e nōhia nei e tātou tērā ka whakamanahia e Ngāi Māori i roto ngā mahi whakatūtū waewae.

Kei ngā kupu o te waiata e mau ana ngā whakaaro o tēnā, o tēnā o tātou. Mā te whakatautau i ēnei kupu, ka puta te wairua. Ahakoa te kaupapa, ko te taiao e nōhia ana e tātou i te wā, koina te wairua ka whakaarahia ake i roto i te tangata.

Ka hoki ake ngā mahara ki te ao tawhito. He rerekē te wairua o ā rātou mahi ki ērā o nāianei. He maha ake ngā whawhai kia noho motuhake tonu te mana Māori huri noa i Aotearoa whānui. Nā ēnei tūāhuatanga, he maha ngā waiata tawhito e kōrero ana mō ngā pōraruraru o te wā.

I tēnei wā, kua tangata whenua te noho o ngā mahi Māori ki tēnei ao. Kua rongonui haere ngā mahi haka, kua whānui ake te rangona o tō tātou reo.

He oranga ngākau te kite i te tokomaha o te tangata kei te tū ki ō rātou hui ahurei, ngā whakataetae ā-rohe, ā-motu anō hoki. Kua whai wāhi anō ngā tamariki kei ngā kura tuatahi me ngā kura tuarua ki te whakatautau ki mua i te marea. Kua kaha ake te puta mai o te mana Māori motuhake. Kua mauri tū, kua mauri ora ki roto i a tātou.

Ko ngā āhuatanga anō o te taiao ērā ka whakapārekareka i te ia o ngā kōrero kua whakatakotoria e tēnā, e tēnā o tātou. Mai i ngā ngaru e whawhati ana i te tai, kua uru atu ngā maharatanga ki a Tangaroa, ki a Hinemoana me ērā atu kaitiaki.

Kia huri ake tātou ki te wehenga o Ranginui rāua ko Papatūānuku. Nā Papatūānuku te manawataki me te tukituki. Nā Tāne te kū o ngā manu me te whē o ngā ngārara. Nā Tāwhirimātea ngā hau whakaohooho. Nā Ranginui ngā rangi waiata.

Me mārama koe ki te ngako o te kōrero kia tau ai te wairua ki roto i a koe. Me kī, “He tātai whakapapa e here nei i ahau ki te ao tūroa.”

Hoki ake ki runga ^