Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Ministry of Education.

Ngā Ngohe

1. Te whakapuaki i te kaupapa

Ka pānui ngā ākonga i ngā whakataukī e kōrero ana mō Matariki. E toru ka tīpakohia hei āta wetewete mā rātou. Matapakina ngā tino uara me ngā whakaaro matua e pā ana ki a Matariki e kitea ana i aua kōrero.

2. Te tautohu pātai

Ka mātakitaki ngā ākonga i te ataata Te whakanui i a Matariki e pā ana ki te kaupapa o Matariki. Ka matapaki ā-akomanga i te kaupapa o Matariki me ngā mahi hei whakanui i a Matariki i tō rātou hapori, i tō rātou whānau, i te motu whānui anō hoki.

He aha ngā mea e mōhiotia ana e pā ana ki a Matariki? He aha ngā mōhiotanga e hiahiatia ana e rātou? Ka tautohu te ākonga i ētahi pātai hei whai māna. Anei tētahi rauemi hei āwhina i te ākonga ki te whiriwhiri whakaaro e pā ana ki te kaupapa:  Mindtools.

3. Te rapu mōhiotanga

Ka mātakitaki ngā ākonga i te kiriata Ngā kōrero o whenua kē. Ka whakarite ngā ākonga i tētahi pūrongo e whakamārama ana i te tirohanga o tētahi atu iwi o te ao ki te wā o Matariki. Kia toru ngā kōwae o tēnei pūrongo:

  • Te whakataki: Ka whakamārama i te whāinga o te pūrongo.
  • Te ngako: Ka whakaahua i ngā kōrero i kitea e pā ana ki tēnei iwi me te wā o Matariki.
  • Te whakakapi: Ka whakarāpopotohia ngā whakaaro matua.

4. Te wetewete me te tātari pārongo

Ka mātakitaki ngā ākonga i te kiriata Ngā tohu a Matariki. Ka whakarārangi mai ngā ākonga i ngā tohu o te wā o Matariki i ngā wā o mua, i ēnei rā anō hoki. He aha ngā tohu i whāia e ngā tīpuna? He aha ngā tohu e whāia tonu ana i ēnei rā? He aha ngā tirohanga hou?

Ka whakataurite ngā ākonga i ā rātou kitenga mā te hoahoa huinga

5. Te tūhura uara me ngā tūmomo tirohanga

Ka waihanga mai ngā ākonga i tētahi maramataka ā-tau e whakaatu ana i ngā tūāhua nui o Aotearoa whānui (hei tauira, ko te rā o Te Kirihimete, ko Te Aranga, ko te aha atu, ko te aha atu). Ka tāpirihia atu ētahi atu rā nui ki tā te Māori titiro (ngā rā e mōhio ana rātou).

Ka matapakina ā-akomanga te ahunga mai o ngā tūāhua nei – Nō hea ēnei tūāhua? Nā wai ēnei tūāhua? He aha te pānga ki te Māori? ki Aotearoa whānui?

6. Te whakaataata me te aromatawai

Ka tuhi ngā ākonga i tētahi reta ki te nūpepa e whakaatu ana i ō rātou whakaaro e pā ana ki ngā tūāhua ka whakanuia e Aotearoa nui tonu. E whakaae ana rātou e whai pānga ana ēnei tūāhua ki a rātou ake, ki te Māori rānei, ki a Aotearoa nui tonu rānei?

Hoki ake ki runga ^