Ngā Ngohe
Te whakapuaki i te kaupapa
1. I te tau 2009, i tukuna tētahi pire ki te Whare Pāremata e pā ana ki Te Rā o Matariki. Ka pānui ngā ākonga i te pire (i roto i te reo Pākehā). Ka mātakitaki ngā ākonga i te ataata Te rā o Matariki e pā ana ki tēnei kaupapa. Ka matapaki ā-akomanga i te pire nei.
- He aha ngā mea e mōhio ana ngā ākonga e pā ana ki te take nei?
- E mārama ana ki a rātou ngā kupu o te pire?
- He aha hoki te pire?
- Nā wai tēnei pire i tuku ki te aroaro o te Whare Pāremata?
- He aha te ngako o te pire nei? He aha i tukuna atu ai te pire nei ki te Whare Pāremata?
Te tautohu pātai
2. Ka ohia manomanotia ngā pātai a ngā ākonga e pā ana ki te pire nā. Mehemea he ōrite, he nui hoki ngā pātai, tukuna ngā ākonga ki te mahi ā-rōpū ki te kimi i ngā whakautu hei whakaatu atu ki te katoa. Matapakina ngā mahi a ngā mema o ngā rōpū.
Te rapu mōhitanga
3. Ka mātakitaki ngā ākonga i te kiriata Te tukanga hanga ture. Ka toroa hoki e rātou tēnei pae ipurangi e whakamārama ana i te tukanga hanga ture i Aotearoa.
Ka whakaatu ngā ākonga i te tukanga hanga ture o Aotearoa:
- mā te pānui rahi
- mā te waiata
- mā te whakaaturanga ā-rorohiko
- mā te mahi hoahoa
- mā te mahi pukapuka rahi.
Te tūhura uara me ngā tūmomo tirohanga
4. Ka mahi ā-rōpū ngā ākonga ki te whakarite i tētahi rārangi uiui (ā-ipurangi, ā-pepa rānei) mō ngā whakaaro o tētahi hunga motuhake (arā, ko ngā kaipakihi, ngā whānau, ngā rangatahi i te kura rānei) e pā ana ki te whakatūnga o Te Rā o Matariki.
Me whakaaro ake ngā ākonga – He aha ngā mōhiotanga me ngā māramatanga e whai ana au mai i tēnei uiuitanga? Kātahi rātou ka āta waihanga mai i ngā pātai. Me rerekē te hunga hei uiuitanga mā ia rōpū ākonga.
Te wetewete me te tātari pārongo
5. Ka kohikohia, ka āta wetewetekia ngā raraunga. Anei ētahi pātai hei āwhina i ngā ākonga:
- E hāngai ana aku pātai ki taku whāinga nui?
- Kua mārama ki a au ngā whakautu?
- Kua mau i a au ngā kōrero katoa e hiahiatia ana?
- He ōrite ētahi whakautu? E kitea ana ētahi tauira?
Te whakaataata me te aromatawai
6. Ka whakarite ngā ākonga i tētahi tono hei whakatakoto ki te ‘Whare’ e whakaatu ana i te tirohanga o taua rōpū ki te pire nei.
Ka tū mai tētahi kaikōrero mai i ia rōpū ki te whakatakoto i ā rātou tono. Mā te kaiako e whiriwhiri mēnā ka tae te pire ki te pānuitanga tuarua.