Ngā Ngohe
1. Te whakapuaki i te kaupapa
Ka mātakitaki ngā ākonga i te ataata Te whakataetae ngā manu kōrero. Ka matapaki ā-akomanga i ngā mea e mōhio ana ngā ākonga mō te wā i whakatūria te kaupapa nei. He pēhea te noho a te Māori i aua wā?
2. Te tautohu pātai
Ka whiriwhiri pātai ngā ākonga e pā ana ki te pānga o te whakataetae nei ki te ao Māori i roto i ngā tau. Anei ētahi pātai hei tauira:
- He hui whakaora i te reo Māori te whakataetae nei mai i tōna tīmatanga?
- He aha ngā hua o tēnei whakataetae mā ngā ākonga?
- He aha i rerekē ai ngā tikanga whakahaere o tēnei hui i roto i ngā tau?
- He aha te āhua o te hui nei ā te tau 2050?
3-5 Te rapu mōhiotanga
3. Ka mātakitaki ngā ākonga i te ataata Te whakahekenga o te reo Māori hei rapu i ētahi whakautu ki ā rātou pātai.
4. Ka pānui, ka mātakitaki hoki ngā ākonga i te rauemi Ngā Manu Kōrero – He Rauemi mā ngā tau 9–13, ka whakarāpopotohia ngā kōrero mō te whakatūnga o te whakataetae Korimako.
5. Ka mātakitaki ngā ākonga i te ataata Te ao o te whaikōrero, ka matapakina tēnei mea te whaikōrero ki tētahi o tō rātou whānau.
6. Te wetewete me te tātari pārongo
Ka whakarārangi mai te ākonga i ngā putanga matua o tāna rangahau. Anei ētahi pātai hei whakaarotanga māna:
- E hāngai ana tēnei kōrero ki taku pātai matua?
- He aha te ngako o tēnei kōrero?
- E mārama ana ki ahau tēnei take?
- He aha atu anō ngā kōrero e hiahiatia ana?
7. Te whakaata me te aromatawai
Ka whakarite mai te ākonga i tētahi kauhau e whakamārama ana i āna kitenga e pā ana ki te kaupapa nei.