Te Hoe Waka
Ngā tuhituhinga
Ko te whakatere waka, te hoe waka hoki ētahi pūkenga o ō tātou tīpuna. He maha ngā momo waka i tāraia mō ngā take huhua, ā, he maha hoki ngā kōrero kei roto i ngā pakiwaitara, ngā pūrākau hoki o ngāi tātou.
Ko ngā waka tuatahi ki Aotearoa nei, ko ngā waka hourua. E rua ngā kōhiwi kia taea ai te tere i runga i ngā au nunui o te moana. Neke atu i te 30 mita te roa o ētahi. He pākaiahi ō ētahi. Ko ētahi atu waka he waka taua, he waka tete, he waka tīwai anō hoki.
Ko te waka tete he waka hī ika. He tino iti noa nei ōna whakairo me ōna whakanikotanga. I te nuinga o te tāima kāore ōna whakairo, he kawe tangata ki runga awa, ki ngā takutai ki te hī ika āna tino mahi.
Ko te waka tīwai, he waka tere awa. Koinei ngā waka ka tino whakamahia hei whakataetae, hei whakangahau.
Ko te waka taua te waka kawe atu i ngā toa ki ngā pakanga. He waka kua whakairohia ki ngā āhuatanga o te riri, te mate, te parekura me te hītori o te tangata Māori.
I tāraitia ēnei waka mai i ngā rākau taketake ake ki Aotearoa, arā, te Tōtara, te Kahikatea me aua rangatira o te ngahere. Ka whakamahia anō ngā tipu pēnei i te raupō hei hanga hērā me te harakeke hei hanga taura.
He tikanga anō mēnā kei te hiahia koe ki te tope i ēnei rākau hei hanga waka. Me āta pātai atu koe ki ngā tohunga tārai waka ki ngā momo āhuatanga o te tārai waka kia kore ai koe e taka ki te hē.