Te Auahatanga o te Kapa Haka
Ngā tuhituhinga
Kāore i hopukina ngā mōhiohio o te ao tawhito ki te pepa, engari i hopukina kētia mā te mātakitaki, te whakawhitiwhiti kōrero me te āta mahi ā-ringa, ka mau ai ki te hinengaro. Koina i kīia ai he kōrero tuku iho.
Ko ngā mahi haka, mahi ā-ringa, ā-tinana anō hoki ētahi huarahi hei whakaputa i ēnei mōhiohio. Kei roto i ngā taonga pūoro me ērā atu whakatangitangi maha, ngā oro hei kīnaki i aua mōhiohio.
Ka huri te ao, ka takatū te haere o ngā mahi a te whare tapere. Kei ngā atamira o te ao, kei waenganui i ngā tikanga o iwi kē e haere ana.
I te tau 1996, i ngā taumāhekeheke whutupōro o te ao, i waiatahia e Hinewehi Mohi te waiata o te motu, mā te reo Māori anake. Koinei te wā tuatahi i rangona ai e te ao whānui i te reo. He maha ngā tāngata kāore i ārikarika atu ki tana mahi. Heoi, kua noho motuhake tēnei waiata ki te reo Pākehā me te reo Māori ināinei.
I te tau 2001, i mahi ngātahi te Royal New Zealand Ballet me te rōpū kapa haka o Te Mātārae i Ōrehu ki te hanga i te whakangahau, a Ihi FRENZY.
I te tau 2012 ka whakatūria e Te Matatini Society Incorporated te whakaari, a Arohanui ki ngā ātāmira o te ao whakangahau ai. Hei tā rātou, “Kia whai wāhi atu te marea ki ngā pūkenga o ngā mahi a te rehia.”
Ko ngā whāinga o Te Matatini, ko te whakatipu, te tiaki me te whakatinana anō hoki i ngā pūkenga i waihohia e ō tātou mātua tīpuna.
Kaua e waiho kia kitea noa iho i ngā marae, i ngā pā o tēnā, o tēnā o tātou. Engari, me tukuna kia rere ki ngā kokonga huri noa i te ao.
Me waiho mā ngā kupu a Tuini Ngāwai hei kawe i a tātou ki ngā taumata, “Ngā hapū katoa o Aotearoa. Tau awhitia rā ko tōku rongo. Kia mau te tihe mauri ora a ngā tūpuna, hei tohu i te wehi e.”