Te Tīmatatanga o te Kapa Haka
Ngā tuhituhinga
I ahu mai ngā mahi haka i te ao tawhito. He taonga tuku iho i tipu mai i te ōrokohanga o te ao mārama, heke noa ki ō tātou tīpuna, tae noa ki a tātou nei.
Te Keepa Stirling
Ko te kapa haka te wairua o ngā mātua tūpuna e rere nei i te rā nei. E rere nei i runga i a mātou i tēnei wā. Ina ka hiahia koutou kia piri mai tēnā wairua, rere atu ngā ringa ki te rangi. Anei, whakatōhia te wairua o ō koutou mātua tūpuna ki roto i a koutou. Tōia ki uta, takahia te whenua, mahia ngā mahi, ka noho ko rātou ētahi tuarā mō koutou hei kaitiaki.
Ka moe a Tama-nui-te-rā i a Hine-raumati, ka puta ko Tānerore. I te wā o te Raumati, ka kite koutou i a Tānerore e wiriwiri ana, e haka mai ana i te awatea. Koinei te haka tuatahi ka kitea i te ao. Nā konei hoki i ahu mai te wiri o ngā ringa. Ko tō mauri tēnā e pupū ake ana ki roto i a koe.
Kia huri ake tātou ki te hokorua a Hineteiwaiwa. He kapa wāhine anake tēnei i tukuna atu e Tinirau ki te kimi i a Kae, te tohunga i patu i tōna mōkai, a Tutunui.
Kāore rātou i mōhio ki tōna āhua, engari nā Tinirau te kī, kia pakiri mai te kata a Kae, ka kite koe i ōna niho tāpiki.
Ka tere rātou ki tēnā pā, ki tēnā pā, tae rā anō ki Te Tihi o Manono, te pā e nōhia nei e Kae me Te Aitanga o Popokorewa. Ka whakangahau, ka whakamahia ngā pūkenga o te whare tapere ki te hopu i a ia.
I tēnei wā, he nui tātou e uruuru atu ana ki ngā kapa haka puta noa i te motu. Ahakoa tamaiti mai, pakeke anō hoki ka kotahi te mahi. Ka puta mai te wairua ngahau, te wairua whakataetae anō hoki ki waenganui i ngā kaihaka.
Ki tā Te Keepa Stirling
Whakamahia ngā kupu, ko ō ringa me tō tinana hei hāpai i ngā kupu kei te whakapuakitia e koe. Ko te haka, nāu ake. Ko tāku ki ngā tauira nei kaua e wareware ko koe te tinana, kaua e wareware ko ō whatu kei roto i tō māhunga, ko tō arero kei roto i a koe.