Te Whakatatae Kapa Haka o Ngā Kura Tuarua o Aotearoa
Ngā tuhituhinga
I ia rua tau ka tū ngā whakataetae kapa haka ā-rohe a ngā kura tuarua. Nō te tau 1997 ka whakarauika ngā toa tokotoru o ia rohe ki ngā whakataetae kapa haka ā-motu mō ngā kura tuarua.
Neke atu i te whā tekau tau ēnei whakataetae e whakahaerehia ana ki ngā rohe huri noa i Aotearoa.
Kei te waiata a Kōhine Pōnika e mea ana, “Ka tahuri ki te awhi mai i aku aha? I aku mahi o aku tīpuna…”
Ka roa koe e parakitihi ana, kia whai wāhi ai koutou ko tō kapa ki ngā taumata e hiahiatia ana e ngā kaiwhakawā. Kia tika rā anō te wiri o ngā ringa, te takahi o te wae, te whiu o tō māhunga, te whakamahi i ō karu, me te piu o tō tinana. Me waia anō koe ki ngā āhuatanga o te whakaeke, te mōteatea, te waiata ā-ringa, te poi, te haka, me te whakawātea. Kaua e wareware me tika tō whakaniko i te kupu, tō whakanako i te kōrero me te korokoro tūī anō hoki. Ka tutuki pai ēnei āhuatanga, ka tau anō hoki ki roto i a koe.
Me waiho ngā kupu whakamutunga ki te rangatira nei a Te Keepa Stirling.
“Kia rangatira, tū rangatira, tū māia, kia motuhake tā koutou tū. Nō te mea ko tō koutou reanga, e mahi nei i te kapa haka. Ko ēnei tohutohu ki a koutou, āpōpō, ka noho hei whakaaturanga mō tō koutou reanga e tipu ake nei āpōpō. He ātaahua i te mutunga nō te mea ko koutou te waha kōrero mō rātou, te iwi o āpōpō. Tēnā koutou, tēnā koutou, ka mau te wehi taiohi mai, kia ora koutou.