Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Ministry of Education.

Ngā Kōrero o Whenua kē

Ngā tuhituhinga

He maha ngā pūrākau mō te kāhui o Matariki.

E ai ki ētahi ko ngā tamāhine tokowhitu ēnei a Urutengāngana rāua ko Hinetūrama.

Ko Matariki, ko Ururangi, ko Waipunārangi, ko Tupuānuku, ko Tupuārangi, ko Waitī, ko Waitā hoki ngā ingoa o ngā tamāhine nei.

Tērā anō te kōrero mō te tikanga o te kupu Matariki. Kāore a Tāwhirimātea i whakaae kia wehea ōna mātua.

Nā tōna pukuriri ki ōna tuākana ka tīkarohia e ia ōna whatū.

Ka whakarauikatia mai te iti me te rahi ki te wāhi kotahi, kia kotahi ai te noho.

Kei ō tātou whanaunga o Te Moana-nui-a-Kiwa ō rātou ake pūrākau hei tāpiri mai ki ērā o te ao Māori.

Ko te aroha ki te taiao tētahi take ka whakairohia e ēnei kōrero ki ngā pakitara o te whare, kia pāorohia ai ki te ao.

Kia huri ake tātou ki ngā pūrākau o te takiwā o Kirīhi.

Ko ngā tamāhine tokowhitu, te kāhui o Matariki, nā Pleione rāua ko Atlas.

Ko Electra, ko Maia, ko Tyegete, ko Alcyone, ko Claeno, ko Aterope, ko Merope ō rātou ingoa.

Ko Pleiades te ingoa whānau.

I tētahi rangi ka whai te ariki nei a Orion i ngā wāhine nei.

Ka kite te atua nei a Zeus, i te hiahia tūkino a Orion i a rātou.

Kātahi ka aroha atu ia ki ngā wāhine nei, ka hurihia hei whetū.

Kia titiro ake tātou ki ngā pūrākau o te takiwā o Hapanihi.

Ko Subaru te ingoa o te kāhui whetū o Matariki, ki a rātou.

Ka kite koe i ēnei whetū i te umanga o Subaru.

Ka hono tēnei umanga i ngā tikanga o te ao tawhito, ki ērā o nāianei.

Kua kite tātou i ngā pūrākau e hono ana i a Ngāi Māori ki ngā iwi o whenua kē.

He mīharo te kite i ngā tāngata kiri mā, kiri whero, kiri pango anō hoki e whakanui ana i a Matariki i Aotearoa nei.

Ahakoa noho tāone mai, noho puihi mai, noho takutai moana mai, ko te ia o Matariki ko te whakawhanaungatanga, ko te manaakitanga, ko te atawhai me te tiaki kia tipu ai ngā kākano. Ko te aroha hoki o tētahi ki tētahi.

Kia eke ai te kōrero, “Matariki ahunga nui, Matariki hunga nui.”

Hoki ake ki runga ^