Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Ministry of Education.

Ngā Tohu a Matariki

Ngā tuhituhinga

Ko te kāhui o Matariki tētahi tohu o te tau hōu Māori. Kei tēnā iwi, kei tēnā iwi ōna ake kōrero mō ngā whetū i te rangi.

I ngā wā o mua, he tohunga ngā tīpuna Māori ki te tātai arorangi.

Nā ēnei mōhiotanga i āhei ai rātou ki te whakawhiti i Te Moana-nui-a-Kiwa, tae noa mai ki Aotearoa.

Ko te takurua te wā ka tiaho mai tēnei kāhui i te pae. Hei konei e kitea ai te mōmona o te kererū me te mahi korotutu ki te hinu.

Me hauhake ngā huawhenua i te Hōtoke kī ai ngā pātaka kai.

I āta mātaki rātou, ngā tīpuna Māori, ki ngā tohu.

Mēnā ka mārama te kite atu i ngā whetū, ka mahana ngā rā e heke mai ana, ā, kua pai ki te whakatō kai i te tīmatanga o te kōanga.

Heoi, ki te rehurehu te kite atu, ka mātao ngā rā, ā, me tatari rā anō mō ngā marama o waenganui i te kōanga whakatō kai ai.

Koinei hoki te wā ka poroporoakitia ngā mate o te tau kua pahure. E tika ana te whai whakaaro ki a rātou kua wehe atu ki tua o te pae.

Whāia tonutia ai tēnei āhuatanga i ēnei rā.

Ka whai wāhi atu hoki ki ngā āhuatanga whanaunga.

Ka mahi tahi ngā reanga maha ki te whakarite te hākari.

He kōanga ngākau te kite i ngā tamariki e mahi ngātahi ana me ngā pākeke.

I tēnei ka eke te kōrero, “Kua takitahi ngā whetū o te kāhui o Matariki.”

I tēnei wā, he tokomaha ngā tāngata kei Aotearoa nei e whakanui ana i te tau hōu Māori.

Kei tēnā whānau, kura, hapū, hāpori anō hoki ō rātou ake mahi pārekareka hei tohu i a Matariki pēnei i te waiata, te haka me ērā atu mahi o te whare tapere.

Hoki ake ki runga ^