Te Ao o te Whaikōrero
Ngā tuhituhinga
Kia kapohia ake e tātou ngā kupu a Hoani te Tuatahi i roto i te Paipera Tapu, “I te timata ko Te Kupu, i te Atua te kupu, ko te Atua anō te kupu. I te Atua te kupu i te tīmatanga”
Ki te titiro ake tātou ki te ia o tēnei whakataukī ka whakamārama pēnei mai.
Nō te orokohanga o te ao ka whanake mai te kupu. Ka taka mai ki a Ranginui rāua ko Papatūānuku me ā rāua tamariki.
He rangatira katoa ēnei Atua. Kātahi ka whakaniko i ēnei kupu, ao ake he kōrero. Ka whakangako ēnei kōrero, kātahi ka puta he taura here i te whakaaro a tētahi tangata ki tētahi atu. Koia nei ka kī, ko te whai kōrero.
Nō whea atu te whai kōrero mēnā kāore i taka mai i ngā Atua? Kei ngā maramara kōrero kua waihohia e te ao tawhito ki a tātou e whakamārama ana i te here ki a rātou, ki te wāhi ngaro. Arā, kei roto i ngā tauparapara ka rangona iho i runga i ngā marae, kei roto i te rākau kōrero, kei roto hoki i ngā whakairo kei ēnei rākau.
Me matatau te tangata tū ki te whai kōrero ki ngā āhuatanga katoa o te kupu me te kōrero tuatahi. Tuarua, me mātua mōhio kei a ia te mana o te whānau, o ōna hapū. Tuatoru ko te mana o ōna iwi. Māna tonu e kimi i ōna heke, i ōna tātai hono ki iwi kē, ki tangata kē. Mā reira ka eke ai te kōrero, “Ko te kai a te rangatira, he kōrero. Ko te wai a te rangatira he wānanga.” Me whakaniko i te kupu, kia ngako ai te kōrero. Koia noa ka kī he rangatira, he rangatira, he rangatira.