Ngā Waka o te Māori
Ngā tuhituhinga
Nō te ōrokohanga mai o te ao ngā kōrero o ngā waka. Ko Te Waka o Tamarereti tērā e tāiri ana ki te tuanui o te ao. Ko Te Waka a Māui tērā e kīia nei ko Te Waipounamu.
I runga anō i te tātai whakapapa, ko ngā waka tīpuna ngā waka i wehe mai i Hawaiki-nui, Hawaiki-roa, Hawaiki-pāmamao ki te whai i te ara a Māui.
Ko Kupe te tipuna tuatahi i tau mai ki ngā wai o Aotearoa nei, ā, ko tōna waka ko Matawhaorua. Ko ētahi atu tīpuna: ko Toroa, ko tōna waka ko Mātaatua; ko Tamatekapua, ko tōna waka ko Te Arawa; ko Hoturoa, ko tōna waka ko Tainui.
He maha noa atu ngā waka i tae mai ki Aotearoa. He kāwai here ō rātou ki ngā iwi me ngā hapū maha, huri noa i te motu.
Mai i taua wā, ka memeha haere te whakamahi i ngā waka hōurua kātahi ka kore e kitea tae noa ki ngā rau tau 1900. Kia tahuri ake ki ngā tau tekau o te 1980 me te 1990 ka whakaarahia mai anō ēnei waka. I āianei kua anga whakamua te tirohanga ki te whakapapa, te ahurea, me te puāwaitanga o ngā mahi hoe waka mō ngā tau e haramai nei.