Ngā Ngohe
1. Te whakapuaki i te kaupapa
Ka mātakitaki ngā ākonga i tētahi ataata o tētahi o ngā kapa haka ā-motu. Ka matapaki ā-akomanga ngā āhuatanga e kitea ana. Hei tauira:
- Te tū a te tāne me te tū a te wahine.
- Ngā tikanga Māori e kitea ana. He aha te take o aua tikanga?
- Te reo Māori.
- Ngā momo waiata.
- Ngā kaupapa o ngā waiata.
2. Te tāutu pātai
Tukuna ngā ākonga kia whiriwhiri pātai e pā ana ki tētahi o ngā āhuatanga o te kapa haka i ēnei rā. Anei ētahi hei tauira:
- He aha te take o te whētero a te tāne me te pūkana a te wahine?
- Nō hea ngā kaupapa o ngā waiata o ngā kapa haka o ēnei rā?
- He aha ngā ture o te whakataetae ā-motu o Te Matatini?
- He aha ngā huarahi e kitea ai ngā tikanga ā-iwi i roto i ngā kapa haka?
- E takahia ana ētahi o ngā tikanga i ngā mahinga a ngā kapa haka i ēnei rā?
- E mārama ana te reo o ngā kapa haka i ēnei rā?
3/4. Te rapu mōhiotanga
Ka mātakitaki ngā ākonga i ngā ataata Te auahatanga o te kapa haka me Te whakataetae kapa haka o ngā kura tuarua o Aotearoa hei kimi mōhiotanga e pā ana ki ā rātou pātai. Ka taea e rātou te kimi mōhiotanga:
- mā te whakarāpopoto i ngā kōrero
- mā te whakarārangi i ngā take matua
- mā te whakautu pātai.
Ka whiriwhiri ngā ākonga i tētahi o ngā hui kapa haka o te motu. Ka mātakitaki ngā ākonga i tētahi ataata o taua hui. Ka tuhi rātou i tētahi kōrero e whakamārama ana i ētahi o ngā āhuatanga motuhake e pā ana ki taua hui.
5. Te wetewete me te tātari pārongo
Ka noho ngā ākonga ki te whakamārama atu i ngā hua o ā rātou rangahau ki tētahi hoa, ki tētahi rōpū iti rānei. Ka whakawhitiwhiti kōrero te rōpū iti nei kia kitea ai mēnā e mārama ana te hunga whakarongo ki ngā kitenga o te kairangahau. Ākina ngā ākonga kia tuku pātai ki te kairangahau. Anei ētahi hei tauira:
- Nō hea tēnā kōrero? I kite koe i ētahi kōrero rerekē?
- He aha te ngako o tērā kōrero?
- E whakapono ana koe ki taua whakaaro?
- He aha koe i mōhio ai e tika ana tērā whakapae?
- E kitea ana tērā āhuatanga i waenganui i ngā iwi katoa?
6. Te whakaata me te aromatawai
Ka whakaatu atu ngā ākonga i te hua o ā rātou mahi mā te kōrero ā-mati. Anei ētahi whakaritenga hei ārahi i ā rātou mahi:
- Me tuhi i ngā kupu kōrero i te tuatahi.
- Ka hopukina ngā kōrero mā tētahi taputapu hopu-reo.
- Kia toru meneti te roa o te kōrero ā-mati.
- Ka kimi rātou i ngā pikitia e tika ana hei whakaahua i ā rātou kupu.